Jæja.
Ég fékk smá tækifæri til að spreða öllum sparnaðinum í rafhjól. Góð ákvörðun? Ég veit það ekki, en dýr var hún. Reyndar ekki alveg eins dýr og hún hefði getað orðið, en dýrari en ég reiknaði með.
Byrjum á byrjuninni. Ég vinn í Fellsmúlanum, og þannig vildi til að rafhjól.is fluttu á Grensás fyrir einhverju síðan, ég tók eftir þessu fyrst í vor. Ég ákvað síðan fyrr í sumar að líta við og skoða úrvalið. Ég fékk að prófa og varð heillaður. Ég hugsaði með mér að með þessu kæmist ég allt sem ég vildi fara, uppá Höfða, útí Hafnarfjörð, niðrí miðbæ og jafnvel til Akureyrar. Kannski smá ýkt, en þið fattið. Ég var hugfanginn af þessari hugmynd, og hef reyndar lengi verið. Að lokum stóðst ég ekki freistinguna og gaf mig á vald rafhjólreiðaguðsins sem er ekki sérlega mikill vinur bílaguðsins, né reiðhjólaguðsins sé útí það farið.
Í sumar hef ég hjólað tiltölulega mikið að jafnaði. Ég hjóla í vinnuna, hjólaði á tónleika, hjólaði til vina, í bíó og svo framvegis. En það er eitt, alveg sama hve mikið ég tek á og reyni að æfa mig, ég get aldrei skroppið neina stutta vegalengd án þess að svitna. Það hefur raunar ekkert að gera með það að það sé svo erfitt að hjóla á Íslandi, heldur er þetta hreinræktað keppnisskap, mig langar alltaf að sigra sjálfan mig og komast hraðar en síðast, ákveðinn kostur, ef ég væri að keppa í Tour de France, en ég er bara að hjóla útí búð eftir mjólk.
Ég varð hugfanginn af þeirri hugmynd að geta sleppt bílnum algjörlega, fengið mér rafmagnshjól og geta ferðast allt sem ég vildi á því. Önnur ástæða var líka sú að þrátt fyrir að gamla DBS hjólið sem ég eignaðist þegar ég var 12 eða 13 ára (að mig minnir?) væri annsi sterkt og gott hjól, þá er það komið til ára sinna og ég er ekki lengur 1,6m að hæð líkt og í þá daga. (18″ hjól er alveg í minni kantinum fyrir einstakling sem viktar 185cm að hæð).
Eftir þá miklu vinnutörn sem ég hafði verið í undanfarið ákvað ég að taka nokkra daga í frí. Eitt af því sem ég gerði einn daginn var að skella mér í hjólreiðatúr um Höfuðborgarsvæðið og skoða reiðhjól í reiðhjólaverslunum landsins. Óhætt er að segja að ef ég dreg saman meðaltal þriggja áhrifavalda þá fannst mér ein búð bera af.
Það var Örninn, og hjólið sem varð fyrir valinu var TREK 4500, hjól með álstelli, vökvabremsum (diskar), 3×9 gíra, læsanlegum dempara úr stýri, endingargóðum (að sögn sölumanns) gírum og hrikalega töff litum. Með þessu keypti ég að sjálfsögðu bretti og afturljós, restina átti ég fyrir og bögglabera ætla ég að skoða aðeins betur áður en ég fjárfesti í.
Næst lág leið mín niður í Rafhjól.is. Þar mætti mér indæll sölumaður sem hefði þó, mátt hafa tæknilegu atriðin örlítið betur á hreinu. Engu að síður seldi hann mér rafmagnskit og 8 gíra krans. Síðar sama dag var kittið tilbúið og ég gat farið og sótt það. Strax um kveldið hóf ég handa við að púsla þessu saman og komst að því, mér til mikillar skelfingar, að mig vantaði að sjálfsögðu annan bremsudisk. Varð því ásetningin að hinkra til næsta kvölds.
Daginn eftir skondraðist ég niður í Rafhjól og fékk bremsudisk. Síðar um daginn hófst ásetningin og gekk ljómandi vel, eða svona hér um bil. Vandamálin sem ég lenti í voru eftirfarandi og skýrðust síðar.
- Það gekk hálf brösulega að stilla bremsudæluna þannig að gjörðin passaði í. Með smá kúnst tókst það nú samt.
- Ég þurfti að bæta við skinnum til að stellið rækist ekki utan í gírkransinn. (Það kom síðar skýring á því en vandamálið er enn til staðar og leysist vonandi á næstu dögum)
- Lagnirnar voru í það styðsta til að henta á hjólið. Litli fagmaðurinn í mér var annsi vonsvikinn að geta ekki valið 100% bestu leiðina fyrir lagnirnar, en það reddaðist.
- Pinnarnir í einu tenginu voru örlítið bognir, en það reddaðist, var samt smá svekktur yfir því en það gæti líka hafa verið klaufa skapur í mér er ég arkaði frá Rafhjól.is uppá verkstæði.
Vandamálið með kransinn er að hann skrúfast ekki eðlilega uppá, og ég þarf sennilega að rífa það í spað og skoða betur.
Heildar kostnaðurinn við þessa aðgerð er svona:
- TREK 4500 á tilboði: 116k ISK
- Aukahlutir uppá c.a. 16k ISK (standari, bretti, ljós ofl)
- Rafkit: 115k ISK f. kit, 6k fyrir 8 gíra krans og 3k fyrir bremsudisk.
- 251k ISK.
Mér finnst það nokkuð vel sloppið með allt sem ég fékk. Reiðhjólið er súper fínt, 21″ stell og virðist frekar sterklegt að sjá. Unun að hjóla á því. Lenti reyndar í óhappi á menningarnótt og sprengdi bæði dekkin undir því, en það var á stefnuskránni að losna við reiðhjólaventalana og fá slöngur með bílventlum í staðinn. Verst að ég reif afturdekkið illa og það er líklegast ónýtt. :(
Nú er ég búinn að hjóla töluvert á þessu hjóli, og enn meira síðan ég fékk rafkittið. c.a. 50km á hjólinu og 35km á rafkittinu. Ég er ekki enn búinn að ganga frá hraðamælinum (og er þar af leiðandi ekki með limiter á hraðanum sem rafmótorinn hjálpar til við). En ég skellti gps tækinu á hjólið og reyni að fylgja 25-30km/h hámarkshraða. Þó ég hjóli töluvert hraðar en það á jafnsléttu.
Það sem ég hef komist að eftir að hafa fengið mér rafmagnshjól:
- Ég er ekki latari við að hjóla og láta reyna á þolið, ég tek hraustlega á þegar mig langar til þess og ég nota mótorinn aðalega upp brekkur.
- Ég er ekki eins latur við að hjóla uppí Hamraborg í Nóatún eða útí Bónus eins og ég var, ófá skipti rölti ég bara uppí 10/11 sem er hér rétt hjá í stað þess að fara útí bónus/Nóatún ef mig vantaði eitthvað smálegt. Til lengri tíma litið mun þetta því spara innkaupakostnað.
- Ég skrepp frekar á fundi á hjólinu en bílnum, því ég get mætt þar án þess að vera móður og blásandi eins og hvalur (með tilheyrandi svita og ólykt)
- Ég er sneggri á milli staða, því meðalhraðinn jókst, þó að hámarkshraðinn hafi ekki gert það. Ég er bara á 22km/h í stað 7-12km/h upp brattar brekkur.
- Meðlahraði minn á gamla hjólinu var um 16km/h að heiman og í vinnu, í dag er hann 22km/h.
Niðurstaðan er því sú að til lengri tíma litið mun þetta sjálfsagt spara mér í bensínkostnaði og rekstri bíls. Það er þó ekki þar með sagt að ég hafi sagt skilið við jeppann, en núna hef ég frelsi til að ferðast á milli staða og nýtt jeppann í það sem hann á að vera nýttur í, að fara á fjöll.
Að lokum nokkrar myndir af E-TREK 4500.
